بدع صالح الصوفي
الله له الحمد مطلق فى السماء شهبه=جنب الميازك وضلى سرجها لهاب
وادعيه يلطف بعبده ساعة الحنبه=نهار فيها نأمل عطفه التواب
العبد يلقى حسابه عين فى كسبه=واضح امامه بلا كاتب ولا حساب
ما ساه من شر يلقى سيئه جنبه= والخير حُسنى وسعده من لهذا طاب
ياعازم اعزم توكل بن علي لبه=لا عند الاشول خطابي وصله للباب
وهده سلامي منقش مثل ما الخضبه=ذي ينقش الزين وسط اليد له رغاب
وورد ما قد قطف قبله من التربه=وعطر عاده مقرطس ما جلب جلاب
صالح علي قال شهر ابريل به كذبه=والشعب ياما صبر من كذبة النواب
من مجلس الشعب ذي ما يتقى ربه=وضع اليمن ساء والجرعات ياغصاب
والأن جأ - ابريل كلن قد نحب نحبه =وحان بذر الأمل ذي يطرح الكذاب
هذا اشتراكي وهذا مؤتمر حزبه=وذا نزل مستقل واصلاح كم واحزاب
والعالم الله لمن باتصبح الوجبه=ومن يكون الأسد والثعل وسط الغاب
ومن بها باتقع له فى القفا ضربه=ومن يشل العصا واصبح بها ضراب
حال انتخابات كلن قادها دربه=والشعب غصباً وطوعاً يدفع الأنصاب
مسكين تعبان يفتح للأمل قلبه=ولو يقولو دواك الشوك فى المزراب
باقول قولى وشاهد ساعت النكبه=وانته ترى بم عينك ما علينا غاب
فالسين مهما تغير ذاك فى نصبه=ما بايبدل وقد قال المثل ما... راب
والحاكم اعلم بما قد فوضه شعبه=وواجبه كيف يرضى جملة النخاب
والأن ياهاجسي بالأمر والرهبه = ما شتركك قط لبي صاحب المحراب
ساكن بدنيا بوسط الهم والكربه=ضاقت حياتي وانا لسا صغير شاب
لا سامح الوقت خلاني في الغربه=بعيد عن موطني والأهل والاحباب
عايش بجسمي وروحي فى اليمن صبه=ما يوم إلا وانا والروح ياسحباب
لا اهنى حياتي ولا تهناني الشربه=حرقي لمن من بلاده يا عريري غاب
واخر حديثي فلول الشعر ما خطبه=ماذا جرى ما حدث فى القطر والركاب
من بعد شايف محمد صارت اللعبه=وكل واحد بقى عنتر بها حراب
كلن نتف جرمله والسيف والحربه=واصبح بها يبن علون استر الجذاب
واصبح كما شفت يامسعد فى النخبه=منظر لكثر التباهي واحسن الأنساب
قد فاض فينا غثاء السيل والزبه=ذي قال ابو قيس انا اشهد له بها صواب
الشعر روح نصيبه راحت الرغبه=وراح صدق المعاني والحلى به ذاب
هذا ولا شى خطا فيما صدر خبه=لا تضهره شى لمكر الحاقد العياب
والختم صلو عدد ما زارها الكعبه=وطاف طايف وضلى حولها لواب
على رسول الهدى ذي ربنا حبه=وحبه الناس واهل البيت والاصحاب
جواب ابو محمد الاشول
يقول اخوغالب افلح من ذكر ربه=يتطمن القلب والخاطر بذكره طاب
يامن خلقت ابن ادم وانته اعلم به=يارب فرج هموم العبد والالغاب
وارفق بمن ضاقت احواله في الغربه=وافقد حنان الولد والاهل والاصحاب
لك حمد لايحتصي في العدّ والحسبه=من قلب شاكر لفضل الواحد الوهاب
يا مرحبا آلاف الاشول قال من قلبه=بضيف يستاهل الترحيب والزلاّب
حيا بصالح علي والقاف ذي صبٌّه=من كذب نيسان يشكي قبل كذبت آب
يا هاجسي لا ترد من خاطري حَبّه=اوجز جوابي في التفصيل والاسهاب
حتى نساوي صفوف الرقص واللعبه=ونبتدي شرحنا بالعود والشُّباب
ماحد من الهجر يشكي والهلي جنبه=تحمّد الله وانظر حالة العُزّاب
ذي يقضوا العمر بعد العمله الصعبه=والنفس من طبعها بعد الهوى تنساب
يا صالح اسمع كلامي واكتبه كتبه=قد رأس الاشول من اهوال التجارب شاب
ماهو من العلم في معلامة الخَرْبِهْ=ذي حصة الدين فيها فُسحة الطلاب
الفتح مكسور والقاضي غُفر ذنبه=ما يعرف النحو والتنوين والاقلاب
والان من ظاهر الموضوع لا لبّه=الكل مجروح من وضع اليمن مرتاب
شرحت لي وضع ما عاد شي معي هربه=من كلمة الصدق لا با اخشى ولا باهتاب
ما دام والقات شل الجربه الخصبه=ذي كان فيها غريس البُنْ والاعناب
ما فايده في عنا الدكتور او طبّه=والشعب هارب من التشخيص والطبّاب
حتى الجمل يدخل المخياط من ثقبه=والشمس تطلع لنا من حيث ما بتغاب
عاد الامل ذي املناه ابتعد قُربه=يوم الحكومه تِعِيْنْ التاجر النصّاب
وقاضي الشرع زنّاره في العَصْبَه=مهما عفى لحيته وقصّر الاشناب
لوما ريشتوه يلعب بالقضاء لعبه=لعنه على المرتشي والقاضي الكذّاب
وزمرة ابليس ما حد خاف من ربه=لا قايد اسلم ولا مجلس اداري تاب
والسّين مفتوح ذي صلحت له نصبه=والرّاء كذلك وبعده قاف للتجواب
وخمسه آلاف قالوا قيمة الدبّه=لكن لرفع المهيّه بنّدوا لابواب
وعاد علم البلاء والويل والنكبه=شباب في العاصمه لا يلبس الجلباب
اهوا على الشرق مسرع قد لحق غربه=خذنا بلاهم وشلوا مننا الاداب
شعب اليمن كانت الامثال تضرب به=في الرجوله مميّز في حسب وانساب
الخزرجي منكبه والاوس من صلبه=مهد العروبه ومن تربيّته خَبّاب
واليوم محنوب في اكله وفي شربه=لا فا المناجم ولا فا النفط والنقّاب
يا حاكم الشعب لك قلبه وله قلبه=مهما تفرعنت ما تبلغ شي الاسباب
با تدفعه غصب ذي ماخذت بالرّغبه=لازم تحاسب وتمكث فا الجحيم احقاب
وتفرزه عظم ذي اكلته من الثَرْبه=انت المحاسب بلعبة مجلس النوّاب
لا يرحم الله حاكم ما رحم شعبه=ذي كل ما فاق من جرعه بأخرى انتاب
والشعر ذي قلت يا صالح قضى نحبه=ما وافقك طال ما عاد الاسد فالغاب
عاد احمد الصنبحي في مستوى الشبّه=لا تنحني له قوافي قاسيةْ لاعصاب
وعاد مدرم وابو عاهد على دربه=وعاد معنا لقاموس الكلام ارباب
وآلاف صلي على الموعود بالرتبه=خير البريه ورمز العابد الاوّاب
يارب من حوضه العذب اسقنا شربه=واهلكت من يِتْهمون الدين بالارهاب